वाचनाची फारशी आवड नसणारे विनोद मात्र आवडीने वाचत, ऐकत किंवा सांगत असतात. विनोदी कथांनाही मोठा वाचकवर्ग आहे. सुनील पांडे यांच्या ‘बंड्या बोर्डात आला!’ या संग्रहातील कथा वाचून चेहऱ्यावर हास्य उमटते. या छोटेखानी कथांमधून विनोद तर आहेच; शिवाय त्यातून एक वेगळा संदेशही मिळतो. ‘बंड्या बोर्डात आला’ या कथेत बंड्याचे घर, गाव बंड्याच्या कौतुकात बुडालेले असताना बंड्या मात्र शांत असतो. त्याचे ‘बोर्डात येण्या’चे गुपित नंतर वाचकांना कळते. ‘केळीची साल’मध्ये रस्त्यावर पडलेली केळीची साल आणि त्यावरून घसरून पडलेले श्यामराव या छोट्या घटनेचा धागा अगदी दहशतवाद्यांपर्यंत नेला जातो. ‘एका लेखकाची गोष्ट’मधून त्याच्या लोकप्रिय (?) साहित्याच्या रद्दीची कहाणी वाचायला मिळते. मुलाने शिक्षणाच्या मागे न जाता राजकारणाचा वारसा चालवावा, अशी इच्छा असणारे सरपंच रंगराव पाटील शाळाच बंद करायला निघतात. त्यांच्या या घोषणेचा प्रवास शिपायापासून शाळेच्या संस्थाचालकापर्यंत कसा होतो आणि हे संकट इष्टापत्ती कसे वाटते, याची ही मजेदार गोष्ट आहे. अशा हसवणाऱ्या ३३ कथा या पुस्तकात आहेत.
पुस्तक : बंड्या बोर्डात आला!
लेखक : सुनील पांडे
प्रकाशन : स्नेहवर्धन प्रकाशन
पृष्ठे : १०४
मूल्य : १२० रुपये
(‘बंड्या बोर्डात आला!’ हे पुस्तक ‘बुकगंगा डॉट कॉम’वरून थेट घरपोच मागविण्यासाठी खालील लिंकवर क्लिक करा.)